Қашқадарё вилоятида фаолият кўрсатувчи тадбиркор кўчма савдо фаолияти учун танланган ерни аукционга чиқаришда ёрдам сўраб, “Тадбиркор виртуал офиси” орқали Бизнес-омбудсманга мурожаат йўллади.

 Аниқланишича, кўчма савдо учун танланган ер майдони тадбиркор томонидан дастурга киритилганлигига қарамай, мутасаддилар томонидан хулоса берилмаган.

Вазирлар Маҳкамасининг 2021 йил 3 августдаги 485-сон қарори билан тасдиқланган Кўчма савдони амалга ошириш тартиби тўғрисидаги Низомнинг 24-бандига кўра, туман (шаҳар) давлат солиқ инспекцияси кўчма савдо объектларини жойлаштириш схемаларини тегишлича Ички ишлар вазирлиги Жамоат хавфсизлиги департаментининг Йўл ҳаракати хавфсизлиги хизмати ва Қурилиш вазирлигининг ҳудудий бўлинмалари билан “K — SAVDO” ААТ орқали 5 иш куни муддатда келишади. “K — SAVDO” ААТга киритилган жойлашиш схемаси юзасидан масъул вазирлик ва идораларнинг ҳудудий бўлинмалари 5 иш кун муддатда келишмаган тақдирда жойлашиш схемаси келишилган ҳисобланади.

Бизнес-омбудсман саъй-ҳаракатлари натижасида беш кунлик муддатда аризага муносабат билдирилмаганлиги сабабли, жойлашиш схемаси келишилган ҳисобланиб, савдога йўналтирилиши таъминланди.