Biznes-ombudsmanga “D.S.” XKdan Toshkent viloyati hokimligi huzuridagi “Yagona buyurtmachi xizmati” DUK tomonidan to‘lovlar kechiktirilayotgani bo‘yicha murojaat kelib tushdi.

Aniqlanishicha, tadbirkor 2022-yilda Bo‘ka tumanidagi maktab filialini qurish bo‘yicha 1,2 mlrd so‘mlik loyihani yakunlab, obyektni topshirgan. Shartnomaga ko‘ra, mablag‘ning 5 foizi (64 mln so‘m) 12 oylik kafolat muddatidan so‘ng to‘lanishi kerak edi. Biroq, obyekt bo‘yicha hech qanday e’tirozlar bo‘lmasa-da, to‘lov 2 yil davomida amalga oshirilmagan.

Vakil tomonidan tadbirkor manfaatida sudga da’vo arizasi kiritilib, 64 mln so‘mlik qarzdorlik to‘liq undirildi.