Тошкент вилоятида фаолият юритувчи «Умид Фарм» МЧЖ (номи ўзгартирилган) банк ҳисоб рақамларига қўйилган тақиқларни бекор қилишда амалий ёрдам сўраб Бизнес-омбудсманга мурожаат қилди.

Аниқланишича, Шайҳонтохур туман суди томонидан фуқаро Б.Ф.га нисбатан жарима жазоси қўлланилиб, моддий зарарни қоплаш учун айбдорга тегишли техника сотувга чиқарилиб, давлат фойдасига ўтказилган.

Аммо ижро ҳужжати талабларини бажаришда хатоликка йўл қўйилиб, суд ҳал қилув қарорида ундирув Б.Ф.га тегишли бўлган ускуналарга қаратилган бўлса-да, давлат ижрочиси томонидан ундирув тадбиркорга қаратилиб, жамиятнинг банкдаги ҳисоб рақамларига банд солинган.

Бизнес-омбудсман девони аралашуви натижасида, жамиятнинг банк ҳисоб рақамларига қўйилган барча тақиқлар бекор қилиниб, дастурда тегишли ўзгартиришлар киритилди ва жамиятнинг қарздорлар рўйхатидан олиниши таъминланди.