Бизнес-омбудсман девони ходимлари комплаенс ва этика бўйича халқаро сертификатланган мутахассис Мила Црногорац Байич билан онлайн учрашув ўтказишди.

Учрашув Босния ва Герцеговинада Бизнес-омбудсман институтини ташкил этиш дастури доирасида тадбиркорлар ҳуқуқларини ҳимоя қилиш бўйича Ўзбекистон тажрибасини ўрганиш мақсадида ташкил этилди. Бугунги кунга қадар Грузия ва Украинанинг шу каби ташкилотлари тажрибаси ўрганилган.

Учрашувда Бизнес-омбудсман девони ходимлари томонидан Ўзбекистоннинг Бизнес-омбудсман институтини ташкил этиш тажрибаси ҳақида батафсил маълумот берилди.

Хусусан, Бизнес-омбудсманнинг ваколатлари рўйхати, унинг вазифалари, шунингдек, фаолият кўрсатган даврда амалга оширган ишлари тўғрисида сўзлаб берилди.

Шу билан бирга, жаҳондаги маълум Бизнес-омбудсман институтлари орасида Ўзбекистон Бизнес-омбудсмани кенг маъмурий ресурслар таъминлангани ва бу ўз навбатида тадбиркорлик субъектларининг ҳуқуқларини ҳимоя қилиш самарадорлигини оширишга хизмат қилиш қайд этилди.