Бир гуруҳ тадбиркорлик субъектлари Кон-геология фаолиятини назорат қилиш инспекциясининг Жиззах минтақавий инспекцияси (кейинги ўринларда Инспекция) ходимларининг хатти-ҳаракатидан норози бўлиб, Бизнес-омбудсманга мурожаат қилдилар.

Ўрганишлар давомида, Инспекциянинг ходимлари томонидан 93 та ноқонуний ва текшириш тартибини бузган ҳолда тадбиркорларда текшириш ўтказилганлиги ҳамда 2 та ҳолатда тадбиркорларнинг мурожаатларини кўриб чиқиш муддатлари асоссиз равишда бузилганлиги аниқланди.

Бизнес-омбудсманнинг аралашувига кўра, Инспекциянинг 14 нафар ҳуқуқбузар ходимлари маъмурий жавобгарликка тортилди, 1 нафари эгаллаб турган лавозимидан озод этилди. 

Мисол учун, “Future” МЧЖ (номи ўзгартирилган) фаолиятида Инспекциянинг ходимлари томонидан Бизнес-омбудсман билан келишилмаган ҳолда текширув ўтказилиб, Жамият раҳбарига нисбатан қонун талабларига зид равишда маъмурий баённома тузилган.

Бизнес-омбудсманнинг Тақдимномасига асосан, юқоридаги тадбиркорларга нисбатан қўлланилган жарима жазоси бекор қилинди.

Маълумот учун: қонунчиликка мувофиқ тадбиркорлик субъектлари фаолиятида ўтказиладиган барча текширувлар текширувларни электрон рўйхатга олиш ягона тизимида рўйхатга олиниши шарт. Текширувларни электрон рўйхатга олиш ягона тизимида рўйхатга олинмаган текширувлар ноқонуний ҳисобланади.