Бугун, 30 январь куни Бизнес-омбудсман девонида Ҳуқуқни муҳофаза қилиш академиясининг “Инсон ҳуқуқларига оид халқаро ҳуқуқ” магистратураси тингловчилари учун амалий машғулот бўлиб ўтди.

Машғулот давомида магистрант ҳуқуқшунослар Бизнес-омбудсман девони фаолиятининг асосий йўналишлари, жумладан, тадбиркорларнинг ҳуқуқлари ва қонуний манфаатларини ҳимоя қилиш механизмлари билан яқиндан танишдилар.

Девон ходимлари томонидан тадбиркорларнинг мурожаатларини кўриб чиқиш тартиби, қонун ҳужжатларини такомиллаштиришдаги иштирок, тадбиркорлик субъектлари фаолиятида ўтказиладиган текширувлар устидан мониторинг олиб бориш ҳамда тадбиркорлик соҳасидаги қонунчилик ижросини назорат қилиш борасида батафсил маълумотлар берилди.

Ушбу сайёр машғулот Ҳуқуқни муҳофаза қилиш академиясининг “Инсон ҳуқуқларини ҳимоя қилишнинг миллий тизими” ҳамда “Шахсий эркинлик ва дахлсизлик ҳуқуқи” модуллари доирасида ташкил этилди. Тадбиркорлик ҳуқуқи инсон ҳуқуқларининг ажралмас қисми эканлигини инобатга олган ҳолда, машғулот тингловчиларга назарий билимларини амалиёт билан боғлаш ва келгусидаги касбий фаолиятида тадбиркорларнинг ҳуқуқларини ҳимоя қилишда зарур бўладиган кўникмаларни ҳосил қилиш имконини берди.

Бизнес-омбудсман девони келгусида ҳам ҳуқуқни муҳофаза қилиш органлари ва таълим муассасалари билан ҳамкорликда тадбиркорлик ҳуқуқи соҳасидаги билимларни оширишга қаратилган тадбирларни ўтказиб боради.