Bugun, 29-yanvar kuni Toshkentda Raqobatni rivojlantirish va iste’molchilar huquqlarini himoya qilish qo‘mitasi, Biznes-ombudsman hamda Savdo-sanoat palatasi hamkorligida “Davlat organlarining tadbirkorlik faoliyatiga noqonuniy aralashuvini oldini olish” mavzusida xalqaro konferensiya o‘z ishini boshladi.

Tadbirda Osiyo taraqqiyot banki, Jahon banki, Xalqaro valyuta jamg‘armasi, Iqtisodiy hamkorlik va taraqqiyot tashkiloti (OECD), BMTning Savdo va taraqqiyot konferensiyasi (UNCTAD) kabi nufuzli xalqaro tashkilotlar ekspertlari, shuningdek, davlat organlari vakillari, tadbirkorlik subyektlari, fuqarolik jamiyati va ilmiy-tadqiqot doiralari vakillari ishtirok etmoqda.

Mazkur konferensiya tadbirkorlik faoliyatining davlat tomonidan ortiqcha tartibga solinishidan xoli holda erkin va mustaqil amalga oshirilishini ta’minlash bo‘yicha xalqaro tajriba va ilg‘or amaliyotlar bilan almashishga qaratilgan.