Biznes-ombudsman Abdumannop Buriyev Samarqand viloyatida tadbirkorlik subyektlarining haqiqiy holatini o‘rganish va ularni qo‘llab-quvvatlash maqsadida navbatdagi uchrashuvlarni o‘tkazmoqda.

Bu galgi manzillarda ham yirik sanoat korxonalari, ham xizmat ko‘rsatish sohasi vakillari bilan bevosita muloqot qilindi.

 Samarqand shahridagi “AZIA METAL PROF” qo‘shma korxonasining faoliyati alohida e’tibor markazida bo‘ldi. Bu yerda qiymati 585,6 mln dollarni tashkil etuvchi metall o‘ramlarni ishlab chiqarish loyihasi 9 bosqichda amalga oshirilmoqda. Loyihaning o‘ziga xosligi – 227,4 mln dollar to‘g‘ridan-to‘g‘ri xorijiy investitsiya jalb etilgani va yuzlab yangi ish o‘rinlari yaratilayotganidadir.

 Viloyatning drayver korxonalaridan biri – “SAG” MCHJda bo‘lib, ishlab chiqarish jarayoni va eksport salohiyatini oshirish bo‘yicha tadbirkorning takliflari tinglandi.

Biznes-ombudsman har bir murojaat va taklif yuzasidan soha mutasaddilariga tegishli ko‘rsatmalar berib, tadbirkorlarning huquqiy himoyasini ta’minlash asosiy vazifa ekanini ta’kidladi.