Қашқадарё вилоятида фаолият кўрсатувчи тадбиркор электр энергияси бўйича асоссиз ҳисобланган қарздорликни бекор қилишда амалий ёрдам сўраб Бизнес-омбудсман девонига мурожаат қилди.

Аниқланишича, тадбиркорнинг электр энергияси истеъмоли нотўғри ҳисоб-китоб қилинган. Яъни ҳисоблагичнинг кўрсаткичлари Электр энергиясини ҳисобга олиш ва назорат қилишнинг автоматлаштирилган тизимига нотўғри киритилиши оқибатида 65,7 миллион сўм асосий қарздорлик ва 19,2 миллион сўм пеня ҳисобланган.

Бизнес-омбудсман девони аралашуви натижасида тадбиркорга асоссиз ҳисобланган жами 84,9 миллион сўм қарздорлик тўлиқ бекор қилинди.

Ҳурматли тадбиркорлар, агар сиз ҳам шу каби муаммоларга дуч келсангиз, бизга мурожаат қилишингиз мумкин.