Жиззах вилоятида тадбиркорлик субъектларининг фаолиятида юзага келаётган муаммоларни ўрганиш ва ҳал этиш мақсадида очиқ мулоқот ўтказилди.

Жиззах вилояти прокурори Б.Иброҳимов, Бизнес-омбудсман девони бош инспектори С.Усманов ҳамда Бахмал туман ҳокими А.Эргашев Бахмал туманида фаолият юритаётган бир гуруҳ тадбиркорлар билан учрашди.

Учрашувда 40 нафар тадбиркор иштирок этди. Тадбиркорлардан 20 дан ортиқ мурожаат қабул қилиниб, шундан 5 таси жойида ҳал этилди. Қолган мурожаатлар қўшимча ўрганиш талаб этганлиги сабабли масъулларга йўналтирилди ва ҳар бир мурожаат алоҳида назоратга олинди.

Бизнес-омбудсман девони томонидан тадбиркорларнинг муаммоларини ҳал этиш ва уларнинг фаолиятини қўллаб-қувватлаш борасидаги бу каби тадбирларни давом эттирилади.