2025 йил 17 январда Ўзбекистон Республикаси Президентининг "Пахта хомашёсини етиштириш ва сотишда бозор механизмларини қўллашни изчил давом эттириш чора-тадбирлари тўғрисида"ги ПФ-7-сонли Фармони қабул қилинди.

Унга кўра, 2025 йил ҳосилидан бошлаб:

Ўзбекистон Республикаси товар-хомашё биржаси календарь йилининг 1 ноябрь кунида пахта толасининг Нью-Йорк биржасидаги фьючерс котировкаларининг охирги 6 ойдаги ўртача котировкасидан келиб чиққан ҳолда келгуси йил ҳосили учун пахта хомашёсининг бошланғич нархини аниқлаб, Биржанинг расмий веб-сайтида эълон қилади;

фьючерс шартномалари календарь йилнинг 1 ноябридан кейинги йилнинг 1 июнигача хўжаликлар ва қайта ишловчилар ўртасида биржада эркин шаклланадиган, бироқ эълон қилинган бошланғич нархдан паст бўлмаган нархда тузилади;

пахта хомашёсини ўз маблағидан ёки тижорат кредит ҳисобидан етиштириб биржада сотган хўжаликларга шаклланган ҳисобварақ-фактура қийматининг 10 фоизи миқдорида субсидия ажратилади.