Biznes-ombudsman tomonidan qishloq xo‘jaligi sohasidagi tadbirkorlarga yer uchastkalarining kamaytirilishi yoki zaxiraga qaytarilishi jarayonida soliq hisoblash tizimi tahlil qilindi.

Davlat kadastrlar palatasining ma’lumotlariga ko‘ra, Qoraqalpog‘iston Respublikasi bo‘yicha 2024-2025-yillarda 1345 ta tadbirkorning 74 231,1 gektar yer maydoni zaxiraga qaytarilgan va UZKAD tizimiga kiritilgan.

Biroq, Soliq va Kadastr tizimlari integratsiya qilingan bo‘lsa-da, Qoraqalpog‘iston Respublikasi soliq boshqarmasi tomonidan 117 ta tadbirkorning yer maydoni kamayganiga qaramay, soliqlar to‘liq hajmda hisoblab kelingan.

Misol uchun: Chimboy tumanidagi “J.” fermer xo‘jaligi 2024-yil iyun oyida 1300 gektar yerini zaxiraga topshirgan bo‘lsa-da, unga 2025-yil uchun ortiqcha 39,8 mln so‘m yer solig‘i hisoblangan va undirilgan.

Soliq kodeksining 427-moddasiga asosan, yer uchastkasining maydoni kamaytirilgan taqdirda, soliq bazasi yer uchastkasi maydoni kamaytirilgan oydan e’tiboran kamaytirilishi belgilangan.

Biznes-ombudsman tomonidan kiritilgan taqdimnomaga asosan, 89 ta faoliyat ko‘rsatayotgan fermer xo‘jaligi bo‘yicha soliqlar qayta hisob-kitob qilinib, tadbirkorlarning haq-huquqlari tiklandi. Qolgan 28 ta korxona bankrotlik yoki faoliyatini tugatganligi sababli tegishli o‘rganishlar o‘tkazildi.