Қонун билан кўзда тутилаётган асосий ўзгаришларни кўриб чиқамиз.

Солиқ кодексига киритилган ўзгартиришга кўра, 2024 йил 1 сентябрдан 2027 йил 1 сентябргача бўлган даврда заргарлик буюмларини ишлаб чиқарувчиларга бир қатор солиқ имтиёзлари берилмоқда. Хусусан:

– «Ҳунарманд» уюшмасининг аъзоларига берилган солиқ имтиёзлари заргарлик буюмларини ишлаб чиқариш билан шуғулланадиган ва «Ўзбекзаргарсаноати» уюшмасининг аъзолари бўлган якка тартибдаги тадбиркорларга нисбатан ҳам татбиқ этилади;

– Заргарлик буюмларини ишлаб чиқариш билан шуғулланадиган ва “Ўзбекзаргарсаноати” уюшмаси аъзолари бўлган тадбиркорлик субъектларининг ишлаб чиқаришда фойдаланиладиган кўчмас мулк объектлари мол-мулк солиғидан ва ер солиғидан озод этилади.

Яъни, ушбу фаолият билан шуғулланувчи тадбиркорлик субъектлари 2024 йил 1 сентябрдан бугунги кунгача бўлган давр учун ҳам солиқ имтиёзларидан фойдаланиш ҳуқуқига эга бўладилар.

Бундан ташқари, Маъмурий жавобгарлик кодексида қимматбаҳо металлар ва қимматбаҳо тошлар тўғрисидаги қонунчиликни бузиш учун жавобгарлик кучайтирилди. Аввал бу ҳуқуқбузарлик учун мансабдор шахсларга БХМнинг 3 бараваридан 5 бараваригача миқдорда жарима солиш белгиланган бўлса, эндиликда жарима миқдори БХМнинг 30 бараваридан 50 бараваригача этиб белгиланди.

Шунингдек, “Лицензиялаш, рухсат бериш ва хабардор қилиш тартиб-таомиллари тўғрисида”ги Қонунга киритилган ўзгартиришга кўра эндиликда хабардор қилиш тарзида амалга ошириладиган қимматбаҳо металлардан ва қимматбаҳо тошлардан заргарлик буюмлари ҳамда бошқа буюмлар ишлаб чиқариш фаолияти турларига юридик ва жисмоний шахслардан қимматбаҳо металларни, шу жумладан олтин изловчилар усулида қазиб олинган қимматбаҳо металларни, қимматбаҳо металлардан ва қимматбаҳо тошлардан ясалган заргарлик ҳамда бошқа буюмларни, шунингдек уларнинг парчалари ва чиқиндиларини сотиб олиш ҳаракати ҳам киритилди.

“Қимматбаҳо металлар ва қимматбаҳо тошлар тўғрисида”ги Қонунга киритилган ўзгартиришларга кўра, Афинаж корхоналарига қуйидаги ҳуқуқлар берилди:

Заргарлик буюмларини ишлаб чиқарувчиларга қимматбаҳо металларни қулай шакллар ва ҳажмларга келтирган ҳолда реализация қилиш;

Қимматбаҳо металлардан сувенир тангаларни ишлаб чиқариш ва реализация қилиш.

Шунингдек, қонунга киритилган қўшимчага кўра, заргарлик буюмларини ишлаб чиқарувчиларга ўзлари қимматбаҳо металлардан ясаган заргарлик буюмларининг ярим тайёр маҳсулотларини бошқа заргарлик буюмларини ишлаб чиқарувчиларга реализация қилиш ҳуқуқи берилди.

Бунда ярим тайёр маҳсулотларни реализация қилиш қиймати заргарлик буюмларини ишлаб чиқарувчилар томонидан Лондон қимматбаҳо металлар бозори уюшмасининг эрталабки фиксинги баҳосидан ва Ўзбекистон Республикаси Марказий банкининг ҳисоб-китоб амалга оширилаётган кундаги курсидан кам бўлмаган миқдорда мустақил равишда белгиланиши қайд этилди.