Жиззах вилоятида фаолият кўрсатувчи «Дилшод» МЧЖ (номи ўзгартирилган) раҳбари ДУК томонидан қарздорлик тўлаб берилмаётганидан норози бўлиб, Бизнес-омбудсманга мурожаат қилди.

Аниқланишича, 2019 йил 19 декабрда “Бинолардан фойдаланиш ва капитал қурилиш дирекцияси” ДУК билан тадбиркор ўртасида шартнома тузилган.

Шартномага мувофиқ, тадбиркор Жиззах вилоят Арнасой туманида “Айдар-Арнасой кўллар тизими” назорат пункти контейнерларида 1 млрд сўмлик мукаммал таъмирлаш ишларини бажариш мажбуриятларини олиши белгиланган.

Қурилиш ишлари тўлиқ бажарилган ва объект комиссияси томонидан далолатнома асосида қабул қилиб олинган бўлса-да, жавобгар томонидан бажарилган ишлар бўйича 281 млн сўм қарздорлик тўлаб берилмаган.

Шунга кўра, Бизнес-омбудсман томонидан ушбу қарздорликни ундириш бўйича Тошкент туманлараро иқтисодий судига даъво аризаси киритилиб, тадбиркорнинг қонуний манфаатлари ҳимоя қилинди. Суднинг ҳал қилув қарори билан тадбиркорга 281 млн сўм қарздорликни ундириш белгиланди.