Сурхондарё вилоятида фаолият юритувчи “Business” МЧЖ (номи ўзгартирилган) пул маблағлари қайтарилмасидан норози бўлиб Бизнес-омбудсманга мурожаат қилди.

Маълум бўлишича, 2018 йилда Жамиятга Сурхондарё вилоят ҳокими қарори билан 10 гектар ер майдони ажратилган. Кейинчалик, мазкур ер майдони бошқа тадбиркорлик субъектига ажратиб берилган.

Таъкидлаш лозимки, ер майдони “Business” МЧЖга қишлоқ хўжалиги ишлаб чиқариши нобудгарчиликларининг ўрнини қоплаш мақсадида 749,2 миллион сўм тўлаш шарти билан ажратилган. Аммо, ер майдони бошқа тадбиркорлик субъектига ажратилганлигидан сўнг, маблағлар қайтарилиб берилмаган.

Тадбиркор бир неча маротаба турли давлат ташкилотларига мурожаат қилиб, ўз маблағини қайтарилишига уринган бўлсада, натижа бўлмаган.

Бизнес-омбудсманнинг аралашуви билан Жамиятга 749,2 миллион сўм маблағи қайтариб берилди.