Fermer xo‘jaliklari va banklar o‘rtasida tuzilgan shartnoma majburiyatlarining ijrosi – qishloq xo‘jaligi mahsulotlarini yetishtirishda muhim omil hisoblanadi. Biznes-ombudsman devoni fermerlarning shartnomaviy huquqlarini himoya qilishda faol ishtirok etmoqda.

Surxondaryo viloyatida faoliyat yurituvchi “D.Sh.” fermer xo‘jaligi paxta yetishtirish uchun imtiyozli kredit olishda amaliy yordam so‘rab Biznes-ombudsmanga murojaat qildi.

Aniqlanishicha, “Agrobank” ATB Denov filiali va fermer o‘rtasidagi shartnomaga ko‘ra, 2026-yilgi paxta hosili uchun 128 mln so‘m kredit ajratilishi belgilangan bo‘lsa-da, mablag‘ni ajratish kechiktirilgan.

Biznes-ombudsman aralashuvi natijasida shartnoma shartlarining ijrosi ta’minlanishi nazoratga olindi. Natijada, fermerga 36 mln so‘m miqdoridagi dastlabki mablag‘ o‘tkazib berildi. Qolgan mablag‘lar shartnoma shartlariga muvofiq, agrotexnik tadbirlar asosida oyma-oy moliyalashtirilishi belgilandi.