2025 йил 1 сентябрдан қонунчиликда кучга кираётган янгиликлар билан таништириб ўтамиз.

 
                Айрим маҳсулотлар учун акциз солиғи қўлланилиши вақтинча тўхтатилади

 Ўзбекистон Республикасида ишлаб чиқарилмайдиган ва белгиланган тартибда аниқ техник параметрлар асосида шакллантириладиган рўйхат бўйича республика ҳудудига олиб кириладиган полиэтилен гранулалари учун акциз солиғи 2025 йил 1 сентябрдан 2028 йил 1 январга қадар ноль ставкада қўлланилади.

Қорақалпоғистон Республикасидаги айрим тадбиркорлик субъектларига улуш киритиш шаклидаги молиявий ёрдам кўрсатилади.

2025 йил 1 сентябрдан бошлаб «Тадбиркорликни ривожлантириш компанияси» акциядорлик жамияти томонидан Қорақалпоғистон Республикасида рўйхатдан ўтиб, ушбу ҳудудда 12 ойдан ортиқ фаолият юритаётган ҳамда бир йил давомида камида 10 нафар кишини доимий иш билан таъминлаган тадбиркорлик субъектларига ўтган йил якунлари бўйича жами даромадининг 50 фоизгача миқдорида улуш киритиш шаклидаги молиявий ёрдам кўрсатиш тартиби жорий қилинади

Заргарлик соҳасида бир қатор янгиликлар

2025 йил 1 сентябрдан бошлаб Давлат асиллик даражаси назорати инспекциясига хорижда ишлаб чиқарилган заргарлик буюмларининг, башарти улар бўйича божхона тўловлари амалга оширилганлигини тасдиқловчи ҳужжатлар бўлмаса, асиллик даражасини текшириш ва тамғалаш ман этилади;

 2025 йил 1 сентябрдан бошлаб:

якка тартибдаги тадбиркорларга заргарлик буюмларини сотиш фаолияти билан шуғулланишга рухсат этилади;

Давлат асиллик даражаси назорати инспекцияси томонидан Тошкент ва Нукус шаҳарлари ҳамда вилоятлар марказларида заргарлик буюмларининг асиллик даражасини текшириш ва уларни тамғалаш бўйича сайёр хизмат кўрсатиш амалиёти йўлга қўйилади;

қимматбаҳо металлар ва қимматбаҳо тошлар тўғрисидаги қонунчиликка оид ҳуқуқбузарликлар тўғрисида «Soliq» мобил иловаси орқали хабар берган шахсларга ундирилган жарима миқдорининг 50 фоизи миқдорида мукофот тўланади.

 2025 йил 1 сентябрдан бошлаб 2028 йил 1 сентябрга қадар:

заргарлик буюмларини (ТИФ ТН 7113- ва 7114-товар позициясидаги маҳсулотларни) Ўзбекистон Республикаси ҳудудига олиб киришда божхона божи 2 фоиз ставкада қўлланади;

заргарлик буюмларини «эркин муомалага чиқариш» ва «экспорт» божхона режимларига жойлаштиришда божхона расмийлаштируви учун йиғим уларнинг божхона қийматидан қатъи назар, базавий ҳисоблаш миқдорининг бир баравари миқдорида ундирилади;

импорт қилинган заргарлик буюмларини Давлат асиллик даражаси назорати инспекциясида тамғалаш учун ундириладиган йиғим миқдори маҳаллий ишлаб чиқарувчилар учун белгиланган миқдорга тенглаштирилади;

божхона чегараси орқали олиб кирилганлигини тасдиқловчи ҳужжатлари бўлмаган заргарлик буюмларини божхона тўловларини амалга ошириш ва божхона юк декларациясини тўлдириш орқали декларация қилишга рухсат берилади.

Мажбурий рақамли маркировкалаш қоидаларига оид янги тартиблар кучга кирмоқда

2025 йил 1 сентябрдан бошлаб:

хавфни таҳлил қилиш тизимида мажбурий рақамли маркировкалаш қоидаларини бузиш ҳолатлари солиқ хавфи даражасини юқори деб баҳолаш учун асос бўлади;

мажбурий рақамли маркировкаланадиган маҳсулотларни реализация қилишда маркировка коди бириктирилмаган электрон ҳисобварақ-фактурани расмийлаштиришга йўл қўйилмайди;

мажбурий рақамли маркировкаланадиган маҳсулотларни чакана реализация қилишда:

маркировка коди киритилгандан сўнг онлайн назорат-касса техникасининг касса чеки шакллантирилади;

аввал фойдаланилган маркировка кодлари киритилганда онлайн назорат-касса техникасининг касса чекини шакллантиришга йўл қўйилмайди.

2025 йил 1 сентябрдан бошлаб фармацевтика фаолиятини ҳамда дори воситалари ва тиббий буюмларни чакана реализация қилиш фаолиятини лицензиялаш талабларига қуйидагиларни назарда тутувчи қўшимча шартлар киритилади:

янгидан ташкил этилган субъектларга лицензия беришда:

фаолиятини амалга ошириш учун кўчмас мулк бўйича ижара ёки текин фойдаланиш шартномаси солиқ органларида ҳисобга қўйилганлиги;

дори воситаларини реализация қилишда харидорлардан тўловларни қабул қилиш бўйича электрон тўлов воситаларидан фойдаланиш имконияти яратилганлиги;

солиқ текширувларида кирим ҳужжатларисиз (контрафакт) ва (ёки) маркировкаланмаган дори воситаларини сотиб олиш, ташиш, сақлаш ёки реализация қилиш ҳолатлари аниқланганда солиқ органлари ташаббусига кўра ваколатли орган томонидан тегишли субъект лицензиясининг амал қилишини тўхтатиб туриш.

Туризм йўналишида янги имкониятлар  

 2025 йил 1 сентябрдан бошлаб 2028 йил 1 январга қадар ҳар йил ажратиладиган 50 миллиард сўм маблағ доирасида Туризмни қўллаб-қувватлаш жамғармаси ҳисобидан:

меҳмонхона, умумий овқатланиш корхоналари ва ресторанларнинг ўз фаолиятини тарғиб қилишга қаратилган аудиовизуал маҳсулотлар (видеофильм, видеоролик, клип ва аниме роликлар) яратиш ва тарғиб қилиш харажатларининг 50 фоизи, лекин 50 миллион сўмдан ошмаган қисми қоплаб берилади. Бунда ушбу мақсадлар учун ҳар йили 20 миллиард сўм ажратилади;

Туризм қўмитаси томонидан белгиланган етакчи хорижий давлатларда маҳаллий тадбиркорлар томонидан ҳар йили 50 та ўзбек миллий таомларига ихтисослаштирилган умумий овқатланиш корхоналари ва ресторанлар ташкил этилганда уларнинг қуйидаги харажатлари субсидияланади:

фаолиятни йўлга қўйиш учун рўйхатдан ўтиш ёки рухсатнома олиш, ижара, дизайн, зарур ускуна ва анжомларни сотиб олиш билан боғлиқ харажатларининг 50 фоизи, бироқ 25 минг АҚШ долларидан ошмаган миқдорда бир марталик субсидия;

таомлар тайёрлаш учун бир йилда 300 килограмм маҳсулотни Ўзбекистондан етказиб бериш бўйича транспорт харажатларининг 50 фоизи, бироқ битта тадбиркорлик субъекти учун 100 миллион сўмгача миқдорда.

Бунда ушбу мақсадлар учун ҳар йили 30 миллиард сўм ажратилади;

жойлаштириш воситалари, йирик савдо мажмуалари ва умумий овқатланиш шохобчалари томонидан ўзларининг ҳудудларида замонавий сузиш ҳавзаларини (бассейн) ташкил этиш билан боғлиқ харажатларининг 50 фоизигача, лекин 100 миллион сўмдан ошмаган қисми қоплаб берилади (дастлабки 100 та бассейн учун).

 Ишни судда соддалаштирилган иш юритиш тартибида кўриб чиқиш учун даъво суммаси миқдори оширилади

2025 йил 1 сентябрдан даъво аризаси бўйича ишни соддалаштирилган иш юритиш тартибида кўриб чиқиш учун даъвонинг максимал баҳосини юридик шахсларга нисбатан базавий ҳисоблаш миқдорининг бир юз эллик бараваригача, якка тартибдаги тадбиркорларга нисбатан юз бараваригача, жисмоний шахсларга нисбатан эллик бараваригача оширилади.

Ҳар бир қурилаётган объектнинг QR-кодли паспорти жорий қилинади.

2025 йил 1 сентябрдан бошлаб ҳар бир қурилаётган объектнинг QR-кодли паспорти жорий қилинади. Бунда QR-кодли паспорт орқали шаҳарсозлик субъектлари, қурилиш муддатлари, шаҳарсозлик ҳужжатлари (эскиз лойиҳалари) ва тасдиқланган экспертиза хулосалари ҳақидаги маълумотларни олиш имконияти яратилади.

 Фаолиятни ихтиёрий тугатиш осонлашади

 2025 йил 1 сентябрдан бошлаб қуйидаги мезонларга бир вақтнинг ўзида жавоб берувчи кичик ва ўрта бизнес субъектларининг фаолиятини ихтиёрий равишда тугатишда солиқ текшируви ўтказилмайди:

охирги уч йилда товарларни (хизматларни) реализация қилишдан олинган жами даромади 10 миллиард сўмдан ошмаган;

бюджет ва кредиторлар олдида қарздорлиги мавжуд бўлмаган ҳамда мунтазам равишда солиқ ҳисоботларини тақдим этаётган;

«Хавфни таҳлил қилиш» электрон тизимида ҳуқуқбузарлик содир этиш хавфи паст даражада таснифланган.

 «Яшил тадбиркор» эътирофини берувчи платформа ишга туширилади

2025 йил 1 сентябрдан бошлаб тадбиркорлик субъектларини «яшил тадбиркор» сифатида эътироф этиш юзасидан қуйидагиларни назарда тутувчи платформа ишга туширилади:

қуйидаги йўналишларда белгиланган кўрсаткичларни бажарган тадбиркорлик субъектларига «яшил тадбиркор» мақомини бериш:

кўкаламзорлаштириш, жумладан, корхонани «яшил белбоғ» билан ўраш, суғориш тизимларини ўрнатиш, томчилатиш, ёмғирлатиш ва контейнерли (қопли) суғориш тизимини жорий қилиш;

энергия тежамкорлигини таъминлаш, жумладан, энергия тежовчи ускуналар ва технологияларни жорий қилиш;

корхонанинг атроф-муҳитга таъсирини камайтириш, жумладан, экологик ҳуқуқбузарлик содир этмаслик, атмосферага ташламаларни онлайн мониторинг қилиш тизимини жорий этиш;

ишлаб чиқаришга циркуляр иқтисодиётни жорий қилиш («7R») тамойилини татбиқ этиш;

- «яшил тадбиркор» мақомини олган тадбиркорлик субъектларига қуйидаги қўллаб-қувватлаш чоралари қўлланилади:

«Шаффоф қурилиш» платформасида устуворлик бериш;

муайян муддат давомида экологик текширувлардан озод этиш;

халқаро бозорларга чиқиш учун қўллаб-қувватлаш;

Тадбиркорлик субъектларининг барқарорлик рейтинги доирасида қўшимча балл бериш.

Туризм соҳасида янги тартиблар

 Қуйидагиларни амалга ошириш имконини берувчи платформа 2025 йил 1 сентябрдан бошлаб синов тариқасида, 2025 йил 1 декабрдан бошлаб тўлиқ ишга туширилади:

сайёҳларга жойлаштириш воситаларини онлайн банд қилиш ва сайёҳлар томонидан баҳолаш;

республикадаги туроператорлар ва турагентлар хизматлари, шу жумладан, сайёҳларга гид, гид-таржимон, йўриқчи-йўл бошловчи, экскурсия етакчилари хизматларидан фойдаланиш;

йўналишсиз такси ва автотранспорт воситалари ижараси хизматларидан фойдаланиш;

автобус, авиа ва темир йўл чипталари, маданий мерос объектлари, музейлар ва бошқа диққатга сазовор жойларга кириш чипталарини харид қилиш;

халқаро ва миллий тўлов тизимлари орқали туристик хизматлар учун тўловларни амалга ошириш;

туризм соҳасига оид статистик ҳисоботларни юритиш ва реал вақт режимида таҳлил қилиш.

«Миллий дўкон»да сертификатланган маҳаллий товарлар савдоси бошланади

 Электрон кооперация портали ҳамда давлат харидлари электрон тизимлари операторларининг «Миллий дўкон» саҳифаларида барча маҳсулотлар маҳаллий ишлаб чиқарилган товар тўғрисидаги сертификат асосида маҳсулотларни жойлаштиришлади  ва савдоларда фақат ушбу сертификатга эга тадбиркорлик субъектлари иштирок этади.