Самарқанд вилоятида фаолият юритувчи "Миришкор Диёр" (номи ўзгартирилган) фермер хўжалиги раҳбари ортиқча тўловларни ҳал этишда амалий ёрдам сўраб Бизнес-омбудсманга мурожаат қилди.

Аниқланишича, 2008 йилда фермер хўжалигига 131,1 гектар ер майдони ажратилиб, кейинчалик ернинг бир қисми бошқа ташкилотларга ўтказиб берилган. Ҳозирда фермер ихтиёрида 66,4 гектар ер қолган, аммо солиқ ортиқча ҳисобланган.

Тақдим этилган ҳужжатларга кўра, хўжаликка 2021 йилда 131,1 гектар, 2022-2023 йилларда 104,3 гектар ҳамда 2024 йилда 100,2 гектар ер майдонидан келиб чиқиб ер солиғи ҳисобланган.

Муаммони ҳал этиш учун Бизнес-омбудсман девони ваколатли органлар билан ҳамкорликда ер майдонининг ҳақиқий ҳажмини аниқлади. Маълум бўлишича, фермер хўжалигининг ер майдони 2022-2023 йилларда 73,2 гектар, 2024 йилда эса 66,4 гектарни ташкил этган.

Вакил девони аралашуви билан хўжаликнинг 2024 йил учун ер солиғи 66,4 гектар ер майдони бўйича ҳисобланиши таъминланиб, 33,8 гектарлик тафовут бартараф этилди.