Самарқанд вилоятида фаолият юритувчи “Umid kompleks” MЧЖ (номи ўзгартирилган) асоссиз ҳисобланган солиқни бекор қилишда амалий ёрдам сўраб Бизнес-омбудсманга мурожаат қилди.

Аниқланишича, Самарқанд вилоят Нуробод туман ҳокимининг қарорларига асосан, тадбиркорга жами 305,3 гектар ер майдони қишлоқ хўжалигида фойдаланиш учун 30 йил муддатга ижарага ажратиб берилган эди. Бироқ Давлат кадастрлар палатаси Нуробод туман филиали ходимларининг хатоси туфайли мазкур ер майдони "Кўчмас мулк-3" базасида қишлоқ хўжалигига мўлжалланмаган ерлар тоифасига киритилган.  Натижада жамиятга асоссиз равишда 651 млн сўм миқдорида ер солиғи ҳисобланган.

Бизнес-омбудсман девони аралашувидан сўнг, "Кўчмас мулк-3" маълумотлар базасидаги хатолик тузатилиб, ер майдони қишлоқ хўжалигида фойдаланиладиган тоифага ўзгартирилди.  Бунинг натижасида асоссиз ҳисобланган солиқ бекор қилиниб, тадбиркорнинг мурожаати ижобий ҳал этилди.