“Малик савдо” (номи ўзгартирилган) МЧЖ раҳбари Солиқ қўмитаси ходимларининг хатти-ҳаракатларидан норози бўлиб, Бизнес-омбудсманга мурожаат қилди.

Аниқланишича, жамиятга Тошкент вилояти давлат солиқ бошқармаси томонидан 11.09.2023 йилда “Солиқ аудитини ўтказиш тўғрисида” хабарнома юборилган. Унда 11.10.2023 йилдан кейин солиқ аудити текшируви бошланиши, текширув охирги 5 йиллик молия-хўжалик фаолияти қамраб олиниши маълум қилинган.

Ваҳоланки, жамиятда муқаддам Тошкент вилояти давлат солиқ бошқармаси томонидан солиқ аудити текшируви ўтказилганлиги, унда 2017-2021 йиллардаги жамият фаолияти ўрганилган.

Қолаверса, жамият Ўзбекистон Республикаси Президентининг 12.06.2023 йилдаги ПФ-93-сонли Фармонига кўра, “20 минг тадбиркор – 500 минг мутахассис” дастурида иштирок этаётганлиги, 31.08.2023 йилдаги тегишли сертификатга эга бўлиб, 53 нафар ишчи ўрин яратганлиги, фармон талабларига мувофиқ солиқ аудити текширувларидан озод этилганлиги кўрсатилган.

Бизнес-омбудсман девони томонидан юборилган сўровномага жавобан, Солиқ қўмитаси томонидан юқоридаги ҳолатлар тасдиқланиб, солиқ аудити ўтказилмаслиги маълум қилинди.